წმ. კამილოს მოქცევის აღსანიშნავად, შესაძლებელია სრული ინდულგენციის მიღება

2024 წლის 17 დეკემბერს, წმიდა კამილოს ორდენის ბერებმა და კონგრეგაციის მონაზვნებმა პაპს თხოვნა გაუგზავნეს, სადაც სთხოვდნენ, მათი მფარველი წმინდანის, წმ. კამილოს მოქცევიდან 450 წლისთავთან დაკავშირებით, ამ საიუბილეო წელს სრული ინდულგენცია გამოეცხადებინა. პაპი ფრანცისკე მათ თხოვნას დათანხმდა და დეკრეტი გამოსცა.

დოკუმენტის მიხედვით, მორწმუნეებს სპეციალური პირობების დაცვის შემთხვევაში, შეუძლიათ სრული ინდულგენცია მიიღონ 2025 წლის 2 თებერვლიდან 2025 წლის 8 დეკემბრამდე.

„ყოვლადუსამღვდელოესო მამაო, თქვენო აღმატებულებავ,

ქვემორე ხელმომწერნი: მამა პედრო ჩელსო ტრამონტინი, სნეულთა მსახურების ორდენის (კამილიელების) გენერალური წინამძღვარი; დედა ზელია ანდრიგეტი, წმინდა კამილოს ასულთა კონგრეგაციის გენერალური წინამძღვარი; დედა ლუსია უოქერი, სნეულთა მსახურების კონგრეგაციის გენერალური წინამძღვარი; დედა ლურდეს კალდერონ ფლორესი, "განხორციელების მხევალთა მონაზვნების" კონგრეგაციის გენერალური წინამძღვარი და მონაზონი ლუიზა მუსტონი, საერო ინსტიტუტის „სნეულთა მისიონერები – ქრისტე იმედი" გენერალური თავმჯდომარე,

თავმდაბლად გთხოვთ,

1967 წლის 10 იანვრის სამოციქულო წესდების "Indulgentiarum doctrina"-ს მე-14 პუნქტის შესაბამისად, საიუბილეო წელს სრული ინდულგენცია გამოაცხადოთ, რომელიც წმინდა საყდარმა მიანიჭა ორდენის წევრებსა და ზემოხსენებული კონგრეგაციების მონაზვნებს, წმინდა კამილო დე ლელისის მოქცევის 450 წლისთავის (1575 წლის 2 თებერვალი) აღსანიშნავად.

კამილიელთა ქარიზმატული ოჯახის სულიერი განახლების ხელშესაწყობად, რომლის შთამაგონებელიც იყო წმინდა კამილო, აგრეთვე ყველა იმ მორწმუნისთვის, ვინც მონაწილეობას მიიღებს აღნიშნულ ცერემონიებში, ჩვენთან მოთანამშრომლე ჯანდაცვის პერსონალისთვის და ყველა იმ სნეულისთვის, რომელნიც ხუთივე კონტინენტზე განთავსებულ ჩვენს დაწესებულებებში იღებენ ზრუნვას, და მადლის ცხოვრებაში აღზევებისთვის, გთხოვთ, რომ 2025 წლის 2 თებერვლიდან (კამილიელთა საიუბილეო წლის საზეიმო გახსნიდან) 2025 წლის 8 დეკემბრამდე (მისი დახურვის დღემდე), მორწმუნეებს მიეცეთ შესაძლებლობა, მიიღონ სრული ინდულგენცია ჩვეულებრივი პირობების დაცვის შემთხვევაში, თუ ეწვევიან:

რომში მდებარე წმინდა მარიამ მაგდალინელის ეკლესიას, სადაც დაცულია წმინდა კამილოს ნეშტი; ბუკიანიკოს სავანეს (წმინდა კამილოს მშობლიური ქალაქი); სან ჯოვანი როტონდოში მდებარე „ჯოჯოხეთის ხეობას", სადაც მოხდა წმინდანის მოქცევა; ასევე ყველა იმ ეკლესიასა და სამლოცველოს, რომელიც ჩვენი ორდენისა და ზემოთ ნახსენები ოთხი კონგრეგაციის მფარველობის ქვეშ ფუნქციონირებს.

ასევე გთხოვთ, განიხილოთ შესაძლებლობა, რომ სნეულებსა და მათ, ვისაც ფიზიკურად არ შეუძლიათ საიუბილეო ღონისძიებებში მონაწილეობა ან წმინდა ადგილების მოლოცვა, მიეცეთ სრული ინდულგენციის მიღების საშუალება – თავიანთი ტანჯვის უფლისადმი შეწირვის ან მოწყალების საქმეთა აღსრულების მეშვეობით, თქვენი უწმინდესობისა და სინანულის საიდუმლოს სამსახურის მითითებების შესაბამისად.

წინასწარ გიხდით მადლობას თქვენი კეთილგანწყობისთვის და გამოვხატავ ღრმა პატივისცემას.

რომი, 2024 წლის 17 დეკემბერი“ – წერია თხოვნაში პაპ ფრანცისკეს მიმართ.

პაპის დეკრეტი კი ასეთია:

„კამილიელთა საიუბილეო წელი: წმინდა კამილო დე ლელისის, სნეულთა და ჯანდაცვის მუშაკთა მფარველის, მოქცევის აღსანიშნავად

სრული ინდულგენციის მიღება შესაძლებელია ამ ადგილას 2025 წლის 2 თებერვლიდან 8 დეკემბრამდე.

სინანულის საიდუმლოს სამსახური, მორწმუნეთა ღვთისმოსაობის განმტკიცებისა და სულების ხსნის უზრუნველყოფის მიზნით, ქრისტეში ყოვლადწმინდა მამისა და ჩვენი უფლის, ღვთაებრივი განგებით პაპ ფრანცისკეს მიერ მინიჭებული განსაკუთრებული უფლებამოსილების ძალით, პატივცემული მამა პიეტრო ჩელსო ტრამონტინის, სნეულთა მსახურების (კამილიელთა) ორდენის გენერალური წინამძღვრის მიერ წარდგენილი თხოვნის საფუძველზე, რომლის მთავარი რეზიდენციაც რომში მდებარეობს, წმინდა კამილო დე ლელისის მოქცევიდან 450 წლის იუბილესთან დაკავშირებით, რომელმაც აღნიშნული ორდენი დააფუძნა, ღვთის უსაზღვრო წყალობისა და ეკლესიის ზეციური საგანძურის ძალით, გულმოწყალედ ანიჭებს სრულ ინდულგენციას ჩვეულებრივი პირობებით (აღსარების საიდუმლო, ევქარისტიული ზიარება და ლოცვა რომის პაპის განზრახვებისთვის) კამილიელთა ოჯახის წევრებს, ამავე ორდენის წევრებსა და ყველა ქრისტიანს, ვინც ჭეშმარიტი სინანულითა და ქველმოქმედების სულისკვეთებით შეძლებს მის მიღებას 2025 წლის 2 თებერვლიდან 8 დეკემბრამდე.

ეს ინდულგენცია ასევე შეიძლება მიეძღვნას განსაწმენდელში მყოფ გარდაცვლილ მორწმუნეთა სულების შვებას, თუ ცოცხალი მორწმუნეები გულით შეუერთდებიან 2025 წლის იუბილეს სულიერ მიზნებს, მოილოცავენ რომში მდებარე „სანტა მარია მაგდალინელის" ეკლესიას ან ზემოხსენებული ოჯახის სხვა საიუბილეო ეკლესიას ნებისმიერ ადგილას, დაესწრებიან იუბილესთან დაკავშირებულ რელიგიურ ცერემონიებს ან გარკვეული დროით მაინც გაჩერდებიან ლოცვაში წმინდანის ნაწილების წინაშე, წარმოთქვამენ „მამაო ჩვენოს", „მრწამსს" და ლოცვებს ყოვლადწმინდა ქალწულ მარიამისა და წმინდა კამილო დე ლელისისადმი.

ხანდაზმულებს, სნეულებს, მათზე მზრუნველ პირებსა და მათ, ვინც სერიოზული მიზეზების გამო სახლიდან ვერ გადის, ასევე შეუძლიათ სრული ინდულგენციის მიღება, თუ გულწრფელად განუდგებიან ყველა ცოდვას და განიზრახავენ, შეძლებისდაგვარად მალე შეასრულონ სამი ჩვეულებრივი პირობა; ამასთან, სულიერად შეუერთდებიან საიუბილეო ზეიმებს და შესწირავენ ღმერთს თავიანთ ლოცვებს, ტანჯვასა და ცხოვრებისეულ სირთულეებს.

ღვთის მიტევების მიღების ხელშესაწყობად, სინანულის სამსახური მოუწოდებს სნეულთა მსახურების ორდენის მღვდლებს, მზადყოფნითა და გულუხვად განაწყონ თავიანთი სული აღსარების საიდუმლოს აღსრულებისთვის, რათა მორწმუნეებს განწმენდის საშუალება მიეცეთ.

ეს განკარგულება ძალაშია მხოლოდ ამ კონკრეტული შემთხვევისთვის, ნებისმიერი საპირისპირო დადგენილების მიუხედავად.

გაცემულია რომში, სინანულის საიდუმლოს სამსახურის რეზიდენციიდან, 2025 წლის 2 თებერვალს, უფლის წელს.

ნიდო გიკაპუს ტიხ ველიოუსის, რაგენს

Nido Gicapus tich Veliousis, Ragens“.

ცნობისთვის, ინდულგენციის მიღება საქართველოში შესაძლებელია კამილიელ ბერების სამლოცველოში, სადაც წმ. კამილოს რელიკვიებია დაბრძანებული. სამლოცველო მდებარეობს თბილისში, ანაპის 414 დივიზიის ქუჩა N11.

თაკო ფეიქრიშვილი